काठमाडौं उपत्यकाबासीका लागि पर्याप्त खानेपानी उपलब्ध गराउन भन्दै दशकभन्दा अघिदेखि सुरु भएको मेलम्ची खानेपानी आयोजना पछिल्लोपटक पनि निर्धारित समयमा सम्पन्न नहुने देखिएपछि यसप्रति सांसदहरुको चासो बढेको छ ।
मेलम्चीको पानी काठमाडौं ल्याउने सबैभन्दा महत्वपूर्ण आधार सुरुङ निर्माणका कारण आयोजना २०७३ वैशाखभित्र सम्पन्न नहुने देखिएको छ । चाइना रेल्वेले प्रतिबद्धता बमोजिम काम नगरेपछि ठेक्का रद्द गरी इटालियन कम्पनीलाई सुरुङको जिम्मा दिइएको थियो ।
तर, उसले पनि निर्धारित समयमा काम सम्पन्न गर्न नसक्ने जनाउ दिएपछि तोकिएको समयमा आयोजना सम्पन्न नहुने देखिएको हो । यस्तोमा व्यवस्थापिका संसद विकास समितिले शहरी विकास मन्त्रालय र मेलम्ची खानेपानी विकास आयोजनालाई आयोजनाको टनेल बनाउने मौजुदा कार्य प्रणालीको गतिलाई बढाई समयमा आयोजना सम्पन्न गर्न निर्देशन दिएको छ ।
समितिका सभापति रवीन्द्र अधिकारीको सभापतित्वमा भएको बैठकले मेलम्ची खानेपानी आयोजना सम्पन्न भएपछि उपत्यकाका भक्तपुर, मध्यपुर ठिमी र कीर्तिपुर नगरपालिका समेतका क्षेत्रहरुमा पानी वितरण गर्ने गरी वर्तमान चरणमै कार्यक्रम सञ्चालन गर्न पनि निर्देशन दिएको छ ।
काठमाडौँको वर्तमान खानेपानी माग प्रतिदिन ३६ करोड लिटर रहेको र यस आयोजनाले १७ करोड लिटर मात्र सप्लाई गर्ने भएकाले वर्तमान र भविष्यको मागलाई सम्बोधन गर्न सँगसँगै अन्य कार्य योजनाहरु प्रारम्भ गर्न निर्देशन दिएको छ ।
यस्तो छ निर्देशन :हेर्न यहाँक्लिक गर्नुहोस |