नेकपा एमालेका केन्द्रीय सदस्य तथा सभासद् रविन्द्र अधिकारीले एकीकृत नेकपा माओवादीको अराजनैतिक सोंच र मोर्चावन्दीले दोस्रो संविधानसभा अत्यन्त जटिल संकटमा परेको बताएका छन् । आग्रह पूर्वाग्रह पालेर सहमति पनि नगर्ने र आफ्ना मात्रै एजेण्डालाई एमाओवादीले स्थापित गर्न खोजेको हठका कारण संविधानसभालाई अलपत्र पार्न खाजेको जिकिर गर्दै अधिकारीले आफ्नो स्वार्थको लागि मात्रै जातीय राज्यको नारा उनीहरुले भट्याएको बताए ।
नेकपा एमाले कास्की क्षेत्र नं.३ ले पोखरामा आयोजना गरेको पत्रकार भेटघाट तथा कास्की जिल्ला कमिटीले आयोजना गरेको कार्यकर्ता भेटघाट कार्यक्रममा उनले सो कुरा बताएका हुन् । आफ्नो पार्टीले जस्तोसुकै प्रतिकुल अवस्थामा पनि समावेंशी संविधान जारी गरेरै छाड्ने तर जातीय विखण्डन र द्वेष फैलाउने राष्ट्रहित विपरितका कुरा स्वीकार्न नसक्ने बताए । दिनमा दोस्रो संविधानसभाले गरेका कार्यहरुको जानकारी दिने क्रममा आफ्नो पार्टीले सहमतिका नाउँमा संविधानसभालाई बन्धक बनाउने कुरा कदापी नस्वीकार्ने र अब जुनसुकै अवस्थामा पनि संविधान जारी गर्ने प्रक्रिया नरोकिने बताए ।
संविधानसभामा एमाओवादीको हर्कत अत्यन्त निकृष्ट र जंगली भन्दै उनले तोडफोडमा उत्रिएको दिनलाई कालो दिनको संज्ञा दिए । कार्यक्रमको अधिकांश समय संविधान निर्माणको प्रक्रियाको सन्दर्भमा बोलेका उनले सहमतिमा पनि नआउने प्रक्रियामा पनि जान नचाहने सोंच उग्रपन्थी बताउँदै माघ ८ कटाउने षडयन्त्रमा एमाओवादी मोर्चा सफल भएको उल्लेख गरे ।
हदैसम्म आफूहरु सम्वाद र सहमतिलाई पर्खेर बसेको तर सहमतिका नाउँमा अब संविधान नै नबनाउने चालबाजी सफल हुन नदिने समेत बताए । संविधान निर्माणको महत्वपूर्ण अवसर गुमाए अहिलेको मोर्चालाई इतिहासले क्षमा नदिने जिकिर समेत गरे । व्यवस्थापिका संसद अन्तर्गत विकास समितिको सभापति समेत रहेका अधिकारीले आफ्नो समितिले गरेका कामहरु र कास्कीका विकास निर्माणका कार्यहरुको प्रगतिका सन्दर्भमा समेत प्रकाश पारेका थिए ।
क्षेत्रीय अध्यक्ष धन बहादुर नेपालीको अध्यक्षतामा सम्पन्न कार्यक्रममा एमाले कास्की अध्यक्ष कृष्ण थापा, क्षेत्रीय उपाध्यक्ष नगेन्द्र गुरुङ्ग र सचिव ऋषिराम गौतम लगायतले बोलेका थिए । यसलगत्तै एमाले कास्कीको आयोजनामा कार्यकर्ता भेला समेत सम्पन्न भएको थियो । कार्यकर्ता भेलामा सभासद् सीता गिरी ओली, सभासद् चुडामणि जंगली लगायत उल्लेख्य नेता तथा कार्यकर्ताहरुको उपस्थिति रहेको थियो ।
स्रोत : न्युज एनआरएन